Feeds:
પોસ્ટો
ટિપ્પણીઓ

Posts Tagged ‘દીકરી’

શૈશવમાં સપનામાં જોયેલી પરી,

father-daughter સદેહે અવતરી…

થઇ દીકરી.

દીકરી…

જુઇની નાજુક કળી,

પ્રભુજીને

ચડાવેલાં ફૂલોની અવેજીમાં મળી.

દીકરી…

દાદાની આંખો પર

કૂણા કૂણા હાથ દાબે,

જાણે પોપચાં પર પવન મૂકયો

ફૂલોની છાબે,

શીતળ, સુગંધિત,

તાજગી ભરી લ્હેરખી

મીંચાયેલી આંખોથી

પણ ઓળખી.

દીકરી…

બારમાસી વાદળી,

ઝરમરતી ઝરમરતી.

રાખે સઘળુંય લીલુંછમ

…બારેય માસ.

દીકરી…

પતંગિયું

ફળિયામાં ઊડાઊડની રંગોળી પૂરે.

શરણાઇ કોણ વગાડે…

એ તો ચૂપચાપ ઊડી જાય…

ને પાછળ રહી ગયેલા રંગો ઝૂરે.

દીકરી…

ચાંદરડું.

દિવસ આખો ઘરમાં તેજ પાથરે,

પકડયું પકડાય ના,

ઊંમરે ને ઓરડે દોડાદોડી કરે…

દાદર ચડે ઊતરે…

સૂરજ સાથે ચાલ્યું જાય. આખરે

વિદાય લીધેલી માની જગ્યા

દીકરીએ

ક્યારે લઇ લીધી.

તે ખબરેય ના પડી.

  • હર્ષદ ચંદારાણા

(અરધી સદીની વાંચન યાત્રા ભાગ-4)

Advertisements

Read Full Post »